HISTORIA

Në sezonin e parë të garave, KB Kalaja nisi rrugëtimin nga kategoria e dytë.

Skuadra zhvilloi një sezon të jashtëzakonshëm, duke e përfunduar kampionatin pa asnjë humbje dhe duke siguruar menjëherë inkuadrimin në Ligën e Parë.

Ishte vetëm hapi i parë i një projekti që kishte ambicie shumë më të mëdha.

Sezoni 2017–18 solli një konkurrencë të fortë, me katër skuadra që synonin ngjitjen në Superligë.

Skuadra jonë arriti deri në finalen për biletën direkte drejt elitës. Pas humbjes në finale, mundësia e dytë erdhi përmes fazës së play-out-it, ku eliminuam KB Borea nga Peja dhe siguruam për herë të parë në historinë e klubit pjesëmarrjen në Superligën e Kosovës.

Ky edicion solli edhe një tjetër sukses të veçantë. Në Kupën e Republikës së Kosovës, në fazën 1/16, eliminuam KB Peja, duke realizuar një nga befasitë më të mëdha të garës. Më pas u kualifikuam në Final 8, të organizuar në Suharekë, duke u bërë skuadra e parë nga Liga e Parë që arrinte këtë sukses.

Sezoni 2020–21 ishte një ndër sezonet më të veçanta në historinë e klubit. Pavarësisht pandemisë, mungesës së tifozëve në palestra dhe vështirësive ekonomike, skuadra tregoi karakter dhe vazhdimësi.

Ponte Prizreni u shpall kampion i sezonit të rregullt të Superligës së Kosovës.

Në playoff, seria gjysmëfinale kundër KB Peja arriti në rezultatin 2–2, por përfundoi me një rezultat zyrtar 20:0 në tavolinë në ndeshjen vendimtare, duke i dhënë fund rrugëtimit tonë drejt titullit. Ishte një përfundim i dhimbshëm për një skuadër që gjatë gjithë sezonit kishte dëshmuar se ishte ndër më të mirat në vend.

Në Kupën e Kosovës arritëm gjithashtu deri në gjysmëfinale, ku u eliminuam nga KB Sigal Prishtina. Skuadra e atij sezoni mbetet një nga gjeneratat që ka lënë gjurmë të veçantë në historinë e klubit.

Pas përfundimit të sezonit paraprak, drejtuesit dhe stafi i klubit vazhduan projektin pavarësisht një goditjeje të madhe financiare: largimit të sponsorit gjeneral Ponte. Klubi vazhdoi garat me emrin Prizreni-16.

Përgatitjet për sezonin nisën shumë vonë, më 26 gusht 2021, ndërsa vetëm pesë ditë më vonë skuadra duhej të paraqitej në Final 8 të Superkupës. Ajo që pasoi u shndërrua në një nga momentet më të bukura të historisë sonë.

Në çerekfinale mposhtëm Dritën, në gjysmëfinale Pejën dhe në finale Trepçën, për ta sjellë në Prizren Superkupën – trofeun e parë në historinë e klubit.

Pas këtij suksesi, kompani vendore, ndër to ABI sh.p.k. dhe Autopjesë Partner, i dhanë mbështetje të rëndësishme klubit.

Në Superligë arritëm deri në çerekfinalen e playoff-it, ku u eliminuam nga Sigal Prishtina, ndërsa në Kupën e Kosovës u ndalëm në çerekfinale nga Bashkimi. Sezoni solli edhe sukses në Ligën Unike Kosovë–Shqipëri: pas eliminimit në gjysmëfinale nga Peja, skuadra mposhti Teutën e Durrësit në ndeshjen për vendin e tretë, duke e përfunduar garën me medaljen e bronztë.

Në sezonin 2022–23, kompanisë së njohur Proton Cable iu bashkua projektit tonë dhe klubi mori emrin që mban edhe sot: Proton Cable Prizreni.

Skuadra e nisi fuqishëm kampionatin dhe deri në muajin dhjetor qëndroi mes katër pozitave të para. Në vazhdim të sezonit, trajneri dhe themeluesi i klubit Arbnor Rifati u pezullua nga pozita e trajnerit. Kjo periudhë ndikoi ndjeshëm në vazhdimësinë e ekipit dhe rezultatet filluan të bien.

Kampionatin e përfunduam në pozitën e shtatë. Në play-out u përballëm me KB Bora, të cilën e eliminuam pas dy ndeshjeve, duke siguruar vazhdimësinë në Superligë.

Në Kupën e Kosovës arritëm deri në çerekfinale, ku u eliminuam nga Golden Eagle Ylli. Në Ligën Unike skuadra ishte në pozitën e parë, por gara nuk arriti të përfundonte për shkak të problemeve që çuan në pezullimin e saj.

Pas rënies nga elita, sezoni 2025–26 ishte një moment vendimtar: të vazhdonim apo të ndaleshim? Mbështetja e bizneseve dhe njerëzve që besuan në klub edhe pas rënies bëri që projekti Proton Cable Prizreni të vazhdonte.

Pas një analize të thellë, drejtuesit e klubit vendosën të ndryshonin filozofinë sportive. Realiteti financiar tregonte se klubi nuk mund dhe nuk duhej të hynte në një garë të pakontrolluar buxhetesh me skuadra që dispononin mjete shumë më të mëdha financiare.

Prandaj u mor një vendim strategjik: më shumë hapësirë për lojtarët e rinj, zhvillim afatgjatë dhe ndërtim i një skuadre mbi baza të qëndrueshme.

Rezultatet erdhën menjëherë. Proton Cable Prizreni u shpall kampion i sezonit të rregullt me vetëm një humbje, ndërsa arriti deri në finalen e playoff-it. Skuadra arriti gjithashtu në finalen e Kupës së Kosovës, duke dëshmuar se një filozofi e bazuar në punë, zhvillim dhe besim te lojtarët mund të prodhojë rezultate edhe përballë diferencave të mëdha financiare.

Në sezonin 2026–27, Proton Cable Prizreni vazhdon me të njëjtën filozofi. Fokusi ynë mbetet zhvillimi i lojtarëve të rinj, krijimi i mundësive për talentet vendore dhe ndërtimi i një klubi të qëndrueshëm, që nuk mat suksesin vetëm me një rezultat apo një sezon.